Rev 20 | PONPDN | STEP | I kilaner tounlan amen kotido san lan, ki en wasa lol mi re a nan lim a o sal mata lapalap.

Revelation of John 20

1 I kilaner tounlan amen kotido san lan, ki en wasa lol mi re a nan lim a o sal mata lapalap. 2 A saikidi drake o serpent en kaua, iei Tewil o Satan, ap saliedi i par kid. 3 O kasedi on nan wasa lol so kapi, ritiniedi o kileledi poa, pwe ender katikatiamau toun sappa, a lao par kid imwisokala. Muri a nok sapadokala ansau kis. 4 O i kilaner mol akan, o ir me kaipokedi poa, kadeikada; o i kilaner nen en ir, me mon ar lepuki saner pweki kadedepan Iesus o masan en Kot, o ir, me so poni man o, o a kilel, o so kilelekida a kilel ni tam ar o ni pa ar. Irail mauredar ap ian Kristus kakaun par kid. 5 A me melar tei kan sota maureda lao par kid imwisokala, iei iasada kaieu. 6 A meid pai o saraui, me pan konodi ias kaieu; mela kariau so kokoa irail, pwe irail wiala samero en Kot o en Kristus akan, o re pan ian i kakaun par kid. 7 Par kid lao imwisokela, Satan ap pan sapedokla san a im en katen. 8 A ap pan parwei katikatia mau toun sap akan, me mi ni kaim paieu en sappa, Kok o Makok, kapokon ir penan mauin; ir me nederenia rason pik en oror. 9 Irail paraparalan nan sappa, rap kapil pena pokon en saraui kan, o kanim kapai; kisiniai ap moredi san lan, karon ir ala. 10 O tewil, me kotaue ir, lokidokila nan le en kisiniai o swepel, wasa me man o saukop likam mia ia, o re pan kalokolok ni ran o ni pon kokolata soutuk. 11 O i kilaner mol puetepuet lapalap eu, o i me kaipokedi poa sappa o lan tan wei san mon silan i, ap solar deu ara me diarokadar. 12 O i kilaner melar akan tikitik o lapalap akan u mon mol o, o puk kan pak pasaner, o pil eu puk me pak pasaner, me puk en kamaur. Melar akan ap pakadeik kidar meakan, me intinkier nan puk kan duen ar wiawia kan. 13 O madau kapeida melar akan, me mimi lole, o mela o wasan mela kidaer, me mi lol ir. Ir karos pakadeikadar iran ar wiawia kan. 14 Mela o wasan mela me pisikindi lan le en kisiniai; iei mela kariau. 15 O meamen, me so intinidier nan puk en kamaur, a pisikindi lan le en kisiniai.